दिग्गजांना मागे टाकत प्रदीप नरवाल ठरला शतकवीर

जयपूरविरुद्ध प्रदीपचे सामन्यात २१ गुण

प्रो-कबड्डीच्या पाचव्या पर्वात पाटणा पायरेट्सचा कर्णधार प्रदीप नरवालने चढाईच्या गुणांमध्ये आपलं शतक साजरं केलं आहे. काल झालेल्या सामन्यात जयपूरचा ४७-२१ असा धुव्वा उडवत पाटणाने सामन्यात बाजी मारली. या सामन्यात प्रदीप नरवालने धडाकेबाज खेळी करत चढाईमध्ये तब्बल २१ गुणांची कमाई केली. यासोबतच प्रदीप पाचव्या पर्वात चढाईत १०० गुण मिळवणारा पहिला खेळाडू ठरला आहे.
महत्वाची गोष्ट म्हणजे राहुल चौधरी, रोहीत कुमार यासारख्या तरुण आणि अनुभवी खेळाडूंना मागे टाकत २० वर्षीय प्रदीप नरवालने ही कामगिरी केली. गेल्या काही सामन्यांमध्ये गतविजेत्या पाटणा पायरेट्सला पराभवाचा धक्का सहन करावा लागला. मात्र यामुळे हार न मानता प्रदीपने अष्टपैलू खेळ करत स्वतःच्या संघाला विजय तर मिळवून दिलाच, आणि स्वतःच्या नावावर एक विक्रमही नोंदवला.